Acceder - Rexistrarse
especie de lagarto da familia dos escíncidos, o esgonzo máis abundante e estendido en Galicia
O esgonzo común ou escáncer de patas común (Chalcides striatus), é unha especie de lagarto da familia dos escíncidos. É o esgonzo máis abundante e estendido en Galicia. Ten tres dedos nas patas, polo que se diferencia do outro esgonzo presente en Galicia (Chalcides bedriagai), que ten cinco dedos e patas menores. Antes considerábase dentro da especie Chalcides chalcides como unha subespecie (Chalcides chalcides striatus) pero agora é unha especie de seu.
É un lagarto de pequeno tamaño, cunha cabeza pequena, triangular, alongada e con fociño arredondado. Orificio auditivo ben visible. O corpo é curto e groso de sección arredondada ou cuadrangular, recuberto de escamas lisas e brillantes. As extremidades son pequenas, o rabo é de sección circular e de menor lonxitude ca o corpo. A especie ten dimorfismo sexual, xa que as femias son de maior tamaño. A coloración pode ser de pardo-amarelada a olivácea con liñas de cor castaña e o ventre de cor branquecha ou con tons amarelos. Os exemplares galegos teñen un fondo pardo ou ocre con de 9 a 11 liñas castañas delimitadas por marcas negras, e o ventre é claro, de ton agrisado ou branco.
