Acceder - Rexistrarse
O visón americano (Neovison vison) é un mamífero carnívoro da familia dos mustélidos semellante á martaraña. Ten a testa ancha, orellas moi curtas e unha pelaxe lustrosa de cor parda uniforme, cunha raia máis escura no lombo e patas curtas con pés anchos. A súa pel é moi estimada pola industria peleteira.
É orixinario de América, a área de distribución natural do visón ocupa a maior parte dos Estados Unidos e no Canadá, dende os límites da tundra ata as rexións áridas do sur do continente.
O visón americano críase en granxas para aproveitar a súa pelaxe en abrigos de pel. Os escapes de animais de granxa e a liberación intencionada por parte de presuntos grupos ecoloxistas permitiron o seu establecemento como especie invasora, poñendo en grave risco ao visón europeo (Mustela lutreola) e danando gravemente a dinámica dos ecosistemas que ocupa.
