Cogomelo dos lameiros

DESCRICIÓN:

Cogomelo de cor branca e tons pardos con chapeu de ata 10 cm cando está aberto. Este está cuberto de finas escamas brancas.

As láminas, inda que comezan de cor crema cando son pequenas, vanse volvendo rosadas para acabar no final do ciclo do cogomelo con esporas de cor negro.

Comeza o seu ciclo como unha bola e vaise facendo un pouco máis alto mentres o sombreiro se estende.

HABITAT:

Gusta dos pastos con esterco, xardíns abonados e camiños onde pase o gando.

DETALLES IDENTIFICATIVOS:

A base do pé acaba en forma de cravo. A cor branca con tons marróns. As láminas rosadas.

DISTRIBUCIÓN:

Frecuente nos pastos de Galicia. Moi relacionado coa gandería.

CONFUSIÓNS:

Hai que coñecer ben este cogomelo para apañalo porque é posible confundilo coa amanita virosa ou amanita verna (que si son mortais).

É máis frecuente confundilo con outros agáricos comestibles como o bitorquis ou o arvensis.

USOS:

É un dos mellores cogomelos para o seu consumo, por ser sinxelo de atopar en grandes cantidades, pola facilidade de limpeza e preparación e polo seu sabor e textura.