Son da Vella usa cookies.
Para o correcto funcionamento da páxina, Son da Vella utiliza cookies. Pode ver as condicións de uso da páxina facendo click aquí: CONDICIÓNS DE USO (Aviso legal)
Se continúa navegando enténdese que as acepta. Pode facer desaparecer esta mensaxe confirmando no seguinte botón:
Acceder - Rexistrarse
As esfinxes de Galicia
As bolboretas nocturnas son insectos moi curiosos e interesantes. Os variados patróns que exhiben, así como as cores que despregan, fan destes lepidópteros uns dos que máis atraen aos entomólogos afeccionados. Entre toda esta variedade, podemos distinguir unha familia que destaca tanto polas súas formas como polo seu tamaño: as esfinxes (familia Sphingidae). Aínda que en Galicia non contamos con moitas especies diferentes, as que habitan nesta terra ofrécennos unha rica visión do vistosos e interesantes que son estes animais.
Podemos afirmar que en Galicia habitan, como mínimo, 17 especies de esfinxes. Aínda que non existe unha bibliografía moi extensa nin estudos exhaustivos sobre estes lepidópteros en Galicia, contamos con numerosas mostraxes realizadas ao longo do territorio, así como observacións, fotografías e vídeos documentados por estudosos e afeccionados. Sempre debemos ser precavidos cos datos e descartar, por moito que nos agraden, aqueles que non sexan fiables ou que non conten cun mínimo de varios avistamentos.
Tamén a experiencia persoal resulta fundamental, participando en numerosas recollidas de datos mediante observacións nocturnas, paseos ou o uso dunha luz especial que atrae a numerosos insectos nocturnos, entre eles a maioría das esfinxes de Galicia. Moitas das observacións realizadas por Sondavella e as diferentes especies que documentamos teñen a súa ficha correspondente na nosa páxina web.
Conceptos básicos sobre as esfinxes
As esfinxes pertencen á familia de lepidópteros coñecida cientificamente como Sphingidae. Caracterízanse pola súa gran capacidade de voo e pola forza das súas ás. Algunhas especies son recoñecidas pola súa habilidade para alimentarse en pleno voo, de forma similar aos colibrís, xa que poden permanecer suspendidas no aire mentres succionan o néctar das flores coa súa longa espiritrompa.
O ciclo de vida das esfinxes segue o patrón doutros lepidópteros, pasan por catro fases: ovo, larva (ou eiruga), crisálide e finalmente adulto. As eirugas adoitan ser grandes e de cores chamativas, cunha especie de "corno" na parte traseira que lles confire unha aparencia moi distintiva.
En Galicia, a variedade de especies pode ser menor en comparación con outras rexións, pero as que atopamos aquí teñen unha relevancia ecolóxica considerable. Non só son importantes como polinizadoras de plantas, senón que tamén xogan un papel fundamental na cadea alimentaria, xa que serven de alimento para aves e outros depredadores.
Ata a data deste artigo as diferentes especies de esfinxes que habitan Galicia serían:
- Acherontia atropos - Esfinxe da caveira
- Agrius convolvuli - Esfinxe das corriolas
- Deilephila elpenor - Esfinxe elefante
- Deilephila porcellus - Esfinxe elefante pequena
- Hemaris fuciformis - Esfinxe abesouro de orla ancha
- Hippotion celerio - Esfinxe da vide
- Hyles livornica - Esfinxe raiada
- Laothoe populi - Esfinxe dos choupos
- Macroglossum stellatarum - Esfinxe colibrí
- Mimas tiliae - Esfinxe das tileiras
- Smerinthus ocellata - Esfinxe ocelada
- Sphinx ligustri - Esfinxe do alfaneiro
- Sphinx maurorum - Esfinxe do piñeiro
- Marumba quercus - Esfinxe do carballo
- Hemaris tityus - Esfinxe abesouro de orla estreita
- Proserpinus proserpina - Esfinxe proserpina
- Hyles euphorbiae - Esfinxe das leiteiriñas
